Psa 46 | HUI | STEP | Ngode Datagaliwabe ibu inanaga ha do hagabi ina hongo ngiagabi ka. Gendabi tara tara handaga beremangi ina biamogo bule ibu hapara howa manda mandabuore haga kagoni.

a 46.1Iba 62.7-8, 91.2, 142.5

b 46.3Iba 93.3-4, Yar 5.22, Md 7.25

c 46.4Iba 48.1, 48.8

d 46.5Yol 2.27, Seb 3.15, Seg 8.3

e 46.6Yos 2.9, 2.24, Iba 2.1

f 46.10Man 4.35, 1 Kin 18.36-39, Ais 2.11, 2.17

Psalms 46

Ngode Datagaliwabe ibuni ina heba kagonigo ogo

1 Ngode Datagaliwabe ibu inanaga ha do hagabi ina hongo ngiagabi ka. ^a
Gendabi tara tara handaga beremangi
ina biamogo bule ibu hapara howa
manda mandabuore haga kagoni.
2 Ibu ani kago manda buwa ina gi naholeberema.
Dindi dumbirumbi biyaguabi hari wedaruninaga pinipodo baga bialu
iba solowara hanunini podopai hayaguabi
ina gi naholeberema.
3 Iba solowararume iba tangu bahalu togo layaguabi ^b
iba ue timbuni lagimbu biyaguabi
iba hai ngoda timbuni wiame hayaguabi
ina gi naholeberema.
Iba yaribu bu yu puíbu bialu hari wedaru mo emabi haga biyaguabi
ina gi naholeberema.

4 Ibaore mbira porago iba ogonime ^c
Ngode Datagaliwabenaga tano Yarusaleme mo turu halu
Ngode Datagaliwabe Daligaorene Daliga kago ibuni hangu haga
anda loma buwa habagi ho helene kagobi
mo turu haga iba ogoni pora.
5 Ngode Datagaliwabe ibu tano odagoniha kagome ^d
tano ogoni mo ko halu bo ereba naholeorebira.
Egabi lole muna biraore ibunime ibalu
tano ogoni biamogo bulebira.
6 Hameigini tara tara paluyu pedarume ^e
gi gibi howa duru ala lalu holebira.
Handame haga kini bu karubi
wali agali tigua haru haga karubi
bibahende bo purogo lelolebira.
Ngode Datagaliwabehanda bi timbuni hari kulu laradagua laragola
dindi bibahendeni wali agali bibahende bu karuni
bo haeala baga bialu ereba hai helolebira.

7 Anduane Homogo Hongo Haiheore kago ibuni ina heba ka.
Yagabanaga Ngode Datagaliwabe ibuni inanaga ha do hagane kagoni.

8 Anduane Homogohanda bigi biyadago de handami̱ya
bibahende ibai hadaba.
Anduane Homogo ibugua dindi bibahendeni mbirale mogolo handabehe binidaru
de handadaba.
9 Dindi bibahendeni wai bialu karu
ibugua mo hundia haga kagoni.
Agalinaga danda minu podaki halu
yandare podo gingirulo baga bialu
humbi yiniyaru yamuwa irani mo delaga kagoni.
10 Ibugua lalu, Wai nabilimu. ^f
Ngode Datagaliwabe i̱ore kogonigo manda bilimu, lalu ka.
Dindi bibahendeoreha wali agali paluyu pedarume i̱naga mini tini kaha howa
mo yaraga hagahaga bialu kagola kogoni
tíni manda bilimu, lalu kagoni.

11 Anduane Homogo Hongo Haiheore kago ibuni ina heba ka.
Yagabanaga Ngode Datagaliwabe ibuni inanaga ha do hagane kagoni.